برسم الدولة اللبنانية والقضاء.

هيدي فاتورة من ال MEA لبطاقة سفر شخص بعرفو، طلب مني أعمل Share لأن ما عندو Facebook.
متل ما شايفين، الرحلة من باريس ع بيروت بتاريخ 14/05/2020، بكلفة 784$.
يلي صار إنو هيدا الشخص، بعد ما اضطر يحكي مع كتير ناس و يعمل واسطة كرمال يرجع ع لبنان، إجاه إتصال من MEA قبل بكم يوم من الرحلة و قالولو إنو إجاهن إسمو على هيدي الطيارة.

-شو سعر البطاقة ؟
-721,10€ (ما بعرف شو سر هالرقم الدقيق).
-طيب أنا تلميذ جامعة، ما بيطلعلي خصم ؟
-لأ، الخصم كان بس بالمرحلة الأولى (شو الفرق ما بعرف) و هلق السعر أقل من 1200€ لأنو عم نعبي الطيارة full capacity (بس الحوت ما هدفو الربح أبدا").
-طيب ممكن أهلي يدفعوا من لبنان و بالليرة اللبنانية ؟
-إيه أكيد، لازم يتواصلوا مع مكتب ال MEA ببيروت.

نزلوا أهلو لهيدا الشخص على مكتب بيروت تيدفعوا، قالولن إنو الحجز ملغى لأن ما اندفع بفرنسا. بعد خناقة مرتبة، رجعوا "زبطوا" و لاقوا مقعد عالطيارة.

-سعر البطاقة بيطلع 784$
-يعني أدّي عاللبناني؟
-لأ ما مناخد لبناني، بس دولار.
-طيب ممكن إدفع chèque ؟ أو بال carte ؟
-لأ ما مناخد غير cash.
-و من وين بجبلكن دولار أنا هلق؟
-ما بعرف، دبر حالك معك ساعة لتدفع أو منلغي الحجز.

راحوا الأهل عند أقرب صراف و اشتروا دولار بسعر 4000 ليرة لبنانية، و رجعوا تيدفعوا.
-هلق بس يوصل إبني فينا نحن ننزل ناخدو من المطار ؟
-لأ، بدنا نعملو PCR و ناخدو عال hotel أول ليلة. هول ال services ضمن سعر البطاقة كمان، مشان هيك السعر أغلى من العادة.

وصل التلميذ عالمطار، ما عملولو PCR ولا أخدو عال hotel، بس أخدو معلومات عنو و قالولو بتروح عالبيت دغري (متل كل الركاب الباقيين).

متل ما شايفين ما في شي من يلي صرح فيه محمد الحوت، أو من يلي قالوا موظفين ال MEA، مظبوط. كلو كذب و سرقة و إحتيال على الناس.

و لمعلوماتكن، الطيارات يلي عم تضهر من لبنان عم بكون فيا ركاب كمان هني راجعين عبلدن يلي MEA رايحة تجيب اللبنانيين منو. ف خبرية إنو الطيارات عم تضهر من لبنان فاضية و هيدا الشي عم بأدي لإرتفاع سعر البطاقة، بلوا و شربوا ميتا. 

تتكون الشغلة واضحة للكل، و خصوصي لأصدقائي يلي بيشتغلوا بال MEA، نحن مش هدفنا يوقف شغلكن ! نحن منعرف انو MEA مش جمعية خيرية، و ما حدا عم يطلب يسافر ببلاش أصلاً ! يلي عم نطلبو هو الشفافية و المصداقية بالتعامل، لا أكتر ولا أقل !

يلي عم تعملو شركة MEA بالشعب اللبناني مش مقبول أبداً، لا أخلاقياً ولا قانونياً. كلنا منعرف إنو الشركة التجارية هدفا الربح، و مش غلط، بس إنو تستفيد من هالأوقات الصعبة، و من ضعف الناس، و تضغط نفسياً علين لأن بدن يرجعوا عبلدن، و تفرض علين الدفع بالدولار cash، هيدا المش مقبول.

بس تنتهي هالأزمة على خير، الناس ما رح تنسى إنو شركة الطيران الوطنية استفادت من ضعغن و تعاملت معن بهالطريقة البشعة. ال MEA أكيد خسرت كتير زباين، و أنا أولن، و انشالله الخير لقدام.