اسمحولي هالمرة اكتب بالدارج لأن يمكن لغتي هيي السبب حتى الناس لا عم تسمع ولا عم تقرا.. 

يا أخي اللي قاعد بالبيت وعم تتفرج خبرني:
- اول شي خبرني اذا عندك كتاب تاريخ غير اللي عندي عم تفتحه وتشبع منه كرامة ويكبر قلبك وتحس حالك بتنتمي لطائفة ملكت التاريخ من شرقه لغربه، بس انشالله بلحظة العنفوان هذه ما يدقوا بابك ويعطوك الكرتونة ويقولولك امضيلنا. او هذا كتاب التاريخ عم تحول اوراقة لدولارات وتصرفها عالعالي ومأمن حالك؟
- إذا شغلك وقف على شو متكل تعيش؟ راح تنطر الكرتونة؟ كيف فيك تنظر بعيون ولادك اللي انت مثلهم الأعلى ورجال لبطتك بتهد الحيط وبالآخر بتفتح الباب امامهم وبتستلم حصتك؟
- اذا بعدك بالشغل وصار معاشك 100 او 200 دولار، من وين ناطر الحل؟ مين ناطر يساويلك حل؟
- إذا مصرياتك وجنى عمرك بالبنك  وكنت مجمع 500 مليون وصارت قيمتهم 100 مليون، يعني سرقوك عالهينة وبتعرف مين سرقك شو ناطر؟ 
- اذا انت بلشت تنكسر على أجار بيتك لأن وقف شغلك او نزلت قيمة معاشك وما عاد يكفيك الا للأكل والشرب، ومسؤولينك قاعدين بقصور وعندهم بيوتهم برا بسبب أنهم سرقوك، راح تقصدهم وتجيب منهم اجار البيت؟
- اذا مجمع كم قرش بالبيت وعارفهم قريبا راح يخلصوا، خبرني شو الحل اللي ناطره؟ يخلصوا وتصير تنطر كرتونة من هون ومساعدة من هونيك؟ 
- انت عارف اذا فتحت المدارس السنة الجاي راح تغلى الأقساط وانت منفض، كيف راح تتصرف؟
ما راح كفي احتمالات، بس خبرني شو ناطر حتى اعمل مثلك وارتاح وأخلص من هالإنتفاضة، بس عندي شرط صغير بدي ضلني حاسس بكرامتي واقدر طلع بعيون ولادي وعائلتي وعيون اللي جبلي الكرتونة طول عمري بدون ما حس بإحساس المنّية والثقل. عم اطلب كثير؟
خبرني بعدك ناطر الحل من اللي عطيته الثقة عشرات السنين وبدل ما يطور بلدك قام عمل ملايين على ظهرك ووصلك للإفلاس؟ عنجد اللي سرقك هو اللي راح يأسسلك بلد جديد؟ أقلها اذا ما سرق ما كان شاهد ومشارك بالإنهيار اللي وصلنالوا؟

يعني بس عطيني سبب واحد يخليك مكبّل بماضيك ومكربج بحبل الكذب اللي سمولك ياه "الوفا" اذا انت مش قادر تعيش الحاضر من تلقاء نفسك ومضطر تعيشه كأنك بالسجن بلا كرامة وبلا معنويات وخجلان من عائلتك ووجبتك بتجيك عالقد حتى ما تموت من الجوع. 

انا عقد عقلاتي شفت امل انو اذا قمنا كلنا سوا اللبنانية وغيّرناهم ممكن نعمل شي، انت خبرني شو شايف حتى مبرّد وقاعد بالبيت؟
دانيل عبد الخالق - 26 حزيران 2020