حكومة الإنقاذ وورقة النعوة

بقلم : حنان الرحيمي

خاص برايفت ماغازين.. 
رئيس حكومة الإنقاذ حسان دياب ..بعد طول إنتظار "نط" على الشاشات متل الديب..فتحنا دينينا، فنجرنا عينينا لنسمع بشائر  الحلول للأزمة، وكيفية رفع البلد من الهاوية اللي رموه فيها دياب السلطة الساقطة
تطلعنا فيك، فحّت حوالينا ريحة الغاز والبترول انتعشنا وانتشينا ودخنا..وتخيلنا إنك جايي تبشرنا بإنجازاتك وكيف حكومة الإنقاذ رجّعِت المال المنهوب على آخر قرش.
وإنو المصارف غصب عنهم "وإجرهم فوق رقبتهن" رجّعوا  للناس أموالهم المحتجزة. 
وإنو الدولار المسكين نزلت حرارته النارية اللي وصلت لل 3000 ودوّبت اللقمة قبل ما توصل لتم الناس.
والوزراء المختصين مع اولياء أمورهم جعلوا من وزاراتهم خلية نحل تعمل ليل نهار.. وعم يتسابقوا لتوزيع عسل إنجازاتهم على المواطن. 
وإذ بك يا مان توقظنا من فظاعة أحلامنا المستحيلة كحلم "إبليس بالجنة" وتزف للبنانيين خبر وفاة لبنان رسمياً..متأثراً بما انتشر على خريطة جسده من "دمامل" متقيحة على مدى عشرات السنين تسمى سرطان السلطة والاحزاب.
شكرا حكومتنا الجديدة ..بعهدكم  تحققت كل مطالبنا بس بدنا طلب زغير واعذرونا الشعب طميع وبنعرف رغبة الشعب عندكم مقدسة..بدنا شوية كمامات ما معنا نشتريها حتى نستقبل كورونا وبحبحولنا القبور شوي.. في ناس ما بتحب تندفن بمقابر جماعية..
كنا عارفين إنو حكومتك ورقة "نعوة"..وانت كنت شايفها "أكلة حلاوة وفخفخة ووجاهة"..طلعت طبخة سم بنكهة الكورونا والدولارونا..
يا حكامنا الأفسد من الفساد على طول وعرض البلاد من راس الهرم لآخر نايب..الحاضر يخبر الغايب.
لبنان خلص بحْ..سرقتوه، أكلتوه، دفنتوه..
على شو بعدكن حاكمين؟..مهمتكن خلصت، خدوا كلاكيشكن وكراسيكن المعفنة وأحزابكن، وتياراتكن، وإلى مزبلة التاريخ  باي باي يا حلوين.
واعلموا ان حاضركم ما عاد مثل أمسكم..فالشعب الذي كان بالأمس يلوك مرارة أفعالكم ويبتلعها بصمت اليوم يلوك هذه المرارة ويبصقها على الدولة.
وشعب إعتاد على الموت اليومي قادر على إحياء عظام الوطن حتى لو كانت رماد.